經營副業 投資硬件前宜三思

話說上周末去行商場市集，竟然撞到行政部Macy在現場擺攤檔售賣自家製手工曲奇，曉陽當然立刻幫襯，支持一下。

Macy撞到曉陽都有多少唔好意思，覺得自己秘撈被發現，所以拜託曉陽唔好同人事部同事講見過自己。

曉陽當然醒目，其實疫情呢3年以嚟大家都發掘咗自己有唔少才能，唔少人開始經營副業，搵多個收入途徑實在好平常。

曉陽認識部分朋友，疫情期間開副業，最終收入竟然高過自己嘅正職，因此乾脆辭工專注經營副業。

要經營副業，大家千祈唔好覺得係一件小事，部署有錯漏，分分鐘未能提升收入之餘更會增加開支。

例如，喺副業仍未有盈利之前就購置一啲硬件配套，購買呢類物資就需要唔少開支，如果唔可以保證未來盈利，呢啲開支就會由成本變成虧損。

曉陽有位朋友就係咁，疫情期間接咗唔少設計嘅freelance工作嚟做，可以增加到一定收入；由於見機會開始多，因此走去買咗部設計用嘅電腦、攝影器材等等。

當然，freelance工作依然係有嘅，但絕非想像中多，真正用到這類專業工具嘅機會其實少之又少，結果器材買咗但用不上，雖然唔可以話成本變成損失，但其實係可以慳番嘅。

如果有心做副業嘅朋友，不妨開始前先諗清楚到底可以做到幾大，或者有無信心做更多，否則投資落去硬件配套，可能分分鐘得不償失。

（本欄逢周四刊登）